XVIII. Soinurbil musika astea

 

Iritsi da aurtengo Soinurbil musika astea!

Edizio honetarako, Usurbilgo Udalarekin batera eta Salbatore Parrokia,Gipuzkoako Foru Aldundia eta Kutxaren laguntzarekin, sekulako sei ikuskizun antolatu ditugu:

• Martxoak 15 Asteartea ‘LALALA’ familia kontzertua (Itzal antzerkia & Pianoa)

Ordua eta lekua: 18:00etan, Sutegiko auditoriumean. Sarrera 2€

Animalien Inauteria (Camille Saint-Saëns): “Itzal antzerkia & Pianoa” Camile Saint-Saëns musikagile frantziarraren “Animalien Inauteria” obran oinarrituta dago. Bertan lehoia, dortoka, kangurua, oiloak eta tankerako animaliak azaltzen dira haien melodia pianoan entzun orduko.

Amaieran, haurrek euren itzalak sortu, eta musikaren erritmoan mugituko dituzte.

 

• Martxoak 16 Asteazkena Urnietako musika eskolarekin trukaketa

Ordua eta lekua: 18:30etan, Sutegiko auditoriumean. Sarrera librea edukiera bete arte.

Urnietako Lourdes Iriondo musika eskola:

Urnietako Musika Eskola 1985eko otsailean abiatu zen Lourdes Iriondoren (1937-2005) eta orduan zegoen gobernu taldearen ekimenez. Horrela musika-hizkuntza eskolak ematen hasi ziren 50 ikaslerekin. Urte horretako urrian, piano eta eskusoinuarekin ere hasi ziren. Maiatzean, garai hartan Elizondo Zinema zen hartan -egun, Sarobe AEG- lehen kontzertua eskaini zuten. Pixkanaka, txistua eta trikitixa irakasten hasi ziren.

Hasieran, eskolak aipatutako Elizondo zinemaren etxabean ematen zituzten. Gerora, euskaltegira joan ziren eta gaur egun Lekaio kultur etxearen ondoan dagoen bolatokiaren gaineko eraikinean daude.

2004an, “Urnietako Udal Eskola” izena hartu zuen, eta 2008tik aurrera, publiko egin, eta “Lourdes Iriondo Udal Musika Eskola” izena dauka. Egun, Eusko Jaurlaritzaren Musika eskolen sareko kide da.

Urnietako Musika Eskola musika irakasteko gunea da, eta bere helburua adin ugaritako urnietar guztiei eta kanpotik etorri nahi dutenei musika heziketa eskaintzea da. Era berean, zaletasuna edo gaitasun berezia duten ikasleei goi mailako ikasketak egiteko orientabidea ematen saiatzen da.

Egun espezialitate hauek ematen dituzte: musika-tailerra eta musika-hizkuntza, trikitixa, biolina, pianoa, saxofoia, klarinetea, perkusioa eta tronpeta.

 

• Martxoak 17 Osteguna ‘Reziklantes’ ikuskizuna

Ordua eta lekua: 18:30etan, Ageri alden.

Ikuskizun hau kalean egiten da, bikote gisa. Kontzertu ibiltari honetan musika estilo ugari jotzen dituzte: perkusio afrikarra eta latinoa, hip-hopa eta Iberiar Penintsulako musika. Soinu-euskarria akustikoa da, jatorria birtziklatu eta berrerabilitako materiala da.

Hondakinak proiektu eszenikorako baliabide dituzte, ingurumenarekiko begiramena lantzeko.

Turukutupa konpainia 2006. urtean Gasteizen sortua da. Hondakinei balioa ematen dieten artista akustiko eta plastikoak dira, eta ingurumena arte- eta kontzientziazio-proiektu baterako baliabide gisa erabiltzen dute.

Hondakin-materialak berreskuratu eta birziklatuta, proposamen artistiko bihurtzen dituzte, hala nola, musika-tresna, eszenografia edota atrezzoa. Bi jarduera-ildo garatzen dituzte: batetik, arte eszenikoak (musika, antzerkia, instalazioak…) eta, bestetik, ingurumen-heziketa (tailerrak, kontzertuak…).

Urte guzti hauetan Espainiar Estatuko hainbat antzerki- eta musika-jaialditan zein ingurumenarekin lotutako hainbat ekitalditan aritu dira.

Musikariak: Sergio López de Landache eta Víctor García de la Torre.

 

• Martxoak 18 Ostirala Rockalean ikuskizuna

Ordua eta lekua: 19:30etan, kalean. Musika ikuskizun ibiltaria.

Rockaleanekoak, 1.000 Anpereko soinu-potentzia baino gehiago duen gurdiaren laguntzari esker, oholtza gaineko taldeak iristen ez diren lekuetara heltzeko aukera dute.

Ikuskizunetan izaten den hesi ikusezin hori haustea da beraiena intentzioa. Ikusleak beraiekin batera dantza, algara eta oihu egitea dute helburu uneoro.

Kantutegia

Rockalearen kantutegi luzeak, betiko joera umoretsua eta hiru hizkuntzatan egindako abesti moldaketak ditu oinarri.

Euskaraz: Hertzainak, Niko Etxart, Mikel Laboa,Kaxiano, Oskorri, Negu gorriak

Gaztelaniaz: Barricada, Extremoduro, Fito y Fitipaldis, Radio futura, Platero y tú, Rosendo, La Polla Records, M – Clan, Loquillo…

lngelesez: AC/DC, Rolling Stones, Metallica, James Brown, Deep Purple…

 

• Martxoak 19 Larunbata Illunbe orkestra sinfonikoa

Ordua eta lekua: 18:00etan, Salbatore Elizan. Sarrera librea edukiera bete arte

Egitaraua:

Viva la vida (Coldplay) – Arranged By Larry Moore.

Palladio – Arranged By Robert Longfield.

Highlights from Harry Potter – Arranged By Michael Story.

Dance of the hours – Arranged By Richard Meyer.

The from New York New York – Arranged By Bob Cerulli.

The Lion King – Arranged By Ted Parson.

The best of Bruno Mars – Arranged By Victor López.

Pirates of the caribbean – Arranged By Ted Ricketts.

Zuzendaria: Joseba Garmendia

Bertaratutakoa zale gaztxoenak, musikoekin batera eserita, kontzertuaz gozatzeko aukera izango dute.

 

• Martxoak 20 Igandea Araiako musika banda

Ordua eta lekua: 12:00etan, kalean 13:00etan, frontoian.

Araiako musika banda:

Gaur egun, Araiako Musika Banda, German Maria Lanzadazal musika elkarteko kide da. Elkarte honek herriko konpositorearen omenez hartu zuen izena; izan ere, musika munduan gauza garrantzitsuak lortu zituen eta orkestra sinfonikorako, pianorako, instrumentu askotarako eta koru kanturako obrak konposatu zituen.

Musika Bandaren lehenengo arrastoa 1873koa da.

Banda 1968an desegin egin zuten, baina Araiako Txarangak bere horretan jarraitu zuen. Otxandioko Musika Bandarekin elkarlanean zenbait emanaldi egin zituen, Bai Euskarari ekitaldikoa, kasu.

1987an, musikaren miresle ziren zenbaitzuk, Araian musika tradizio handia izanik, berriz ere martxan jarri zuten Banda. Hogeita hamar kidek osatu zuten, tartean hogei urte lehenago desegindako banda kide ziren hamarrek.

Egitaraua

“El Albero” de Ordizia -J.L. Irizar

Hallelugah -Leonar Coen Arr. Frank Bernaerts

Waltz nº 2 -Dimitri Shostakovich Arr. Johan de Meij

Crescendo -Harm Evers

Asperdurari Aurre Egiten -J.M. Bastida “Txapi”

Xalbadorren Heriotzean -Xabier Lete

Vals de ejecución -Nicolas García Arr. Alberto Santos

Jota Vals de Estella

Araiako Musika Banda eta Ezberdiñako Gaiteroak

Zuzendaria: Alfredo Markinez Aroztegi

 

* Aurtengo organo erakustaldia bertan behera gelditzen da